ఉత్తరప్రదేశ్‌లోని గోరఖ్‌పూర్ జూలో ఉన్న సింహం పటౌడి ఆరోగ్య పరిస్థితి ప్రస్తుతం తీవ్రమైన దశకు చేరుకుంది. పటౌడికి 15 ఏళ్లు వయసు కాగా, అతని కాలేయంలో ఏర్పడిన ఇన్ఫెక్షన్ తీవ్రంగా వ్యాపిస్తోంది. పలుమార్లు వైద్యం అందించినా ఆరోగ్యంలో మెరుగుదల కనిపించకపోవడంతో, శనివారం సాయంత్రం అతన్ని మరింత మెరుగైన చికిత్స కోసం కాన్పూర్ జూకు తరలించారు.
గోరఖ్‌పూర్ జూ సిబ్బంది తెలిపిన వివరాల ప్రకారం, గత నెల రోజులుగా పటౌడీ ఆరోగ్యం క్రమంగా క్షీణిస్తోంది. సాధారణంగా రోజుకు 12 నుండి 15 కిలోల మాంసం తినే ఈ సింహం, ఇప్పుడు రోజుకి 4–5 కిలోల మాంసం కూడా తినలేక పోతుంది. శరీరం బలహీనమవుతూ ఉన్నందున, బరేలీలోని ఇండియన్ వెటర్నరీ రీసెర్చ్ ఇన్స్టిట్యూట్ నిపుణులు అతనికి చికిత్స అందిస్తున్నారు. గోరఖ్‌పూర్ జూలో తగిన సౌకర్యాలు లేకపోవడంతో, మరింత వైద్యం కోసం పటౌడీని కాన్పూర్‌కు తరలించారు.
ఇక పటౌడీ జీవితంలో మరొక కీలక అధ్యాయం – అతని జీవిత భాగస్వామి మరియంతో సంబంధం. గుజరాత్‌లోని షక్కర్‌బాగ్ అడవుల్లో స్వేచ్ఛగా సంచరిస్తున్న పటౌడీని ఎటావా సఫారీకి తీసుకువచ్చారు. అక్కడే మరియంతో పరిచయం ఏర్పడింది. వారు త్వరగా మంచి అనుబంధాన్ని ఏర్పరుచుకొని, తరచూ కలిసి కనిపించేవారు. అనంతరం ఇద్దరినీ గోరఖ్‌పూర్ జూకు తరలించగా, వారి అనుబంధం అక్కడ కొనసాగింది.
అయితే, మరియం అనారోగ్యంతో మరణించడంతో, పటౌడీ తీవ్ర మనోవేదనలో కూరుకుపోయాడు. అది అతని ప్రవర్తనపైనా, ఆరోగ్యంపైనా ప్రతికూల ప్రభావం చూపింది. ముందు ఎంతో చురుకుగా ఉండే పటౌడీ ఇప్పుడు మూలల్లో నిశ్శబ్దంగా కూర్చునే స్థితికి చేరుకున్నాడు. మరియం మృతి తరువాత అతని ఆహారం తగ్గిపోయింది, ఆరోగ్యం క్షీణించింది, చివరికి వైద్య చికిత్స కోసం ఇతర జూకు తరలించే పరిస్థితి ఏర్పడింది.
