ఈ డిజిటల్ యుగంలో ఎక్కువ మందికి కనీసం ఒక్క క్రెడిట్ కార్డు(Credit card) ఉండటం సాధారణమే. కొందరికి ఒకటే ఉంటే, మరికొందరికి మూడూ నాలుగు లేదా ఇంకా ఎక్కువ కార్డులు ఉండటం చూస్తుంటాం. అందుకే “ఎక్కువ క్రెడిట్ కార్డులు ఉన్నా స్కోర్(Credit score) పెరుగుతుందా?” అనే సందేహం చాలామందిలో ఉంటుంది. నిజానికి, కార్డుల సంఖ్యకన్నా వాటిని ఎలా వాడుతున్నాం అనేదే ముఖ్యమైన విషయం.
బహుళ కార్డుల ఉపయోగాలు కూడా ఉన్నాయి. వాటిలో ముఖ్యమైనవి — మీరు ఒక్కో కార్డు తక్కువగా వాడితే మొత్తం క్రెడిట్ వినియోగం తగ్గుతుంది. ఇది స్కోర్‌కు సహాయకరంగా ఉంటుంది. అలాగే, ప్రతి కార్డులో వేరే వేరే ఆఫర్లు, క్యాష్‌బ్యాక్, రివార్డ్‌లు లభించడంతో ఆర్థికంగా లాభాలు పొందవచ్చు.
అలాగే, నష్టాలు కూడా ఉంటాయి. కొత్త కార్డుల కోసం దరఖాస్తు చేసుకుంటే బ్యాంకులు కఠిన తనిఖీలు చేస్తాయి. ఇవి తాత్కాలికంగా స్కోర్ తగ్గించవచ్చు. అలాగే, కొత్త ఖాతాల వల్ల ఖాతాల సగటు వయస్సు తగ్గి ప్రతికూల ప్రభావం చూపుతుంది. అన్ని కార్డుల బిల్లుల తేదీలు గుర్తుపెట్టుకోవడం కష్టం కావడంతో, ఆలస్య చెల్లింపుల ప్రమాదం ఉంటుంది. అంతేకాక, ఎక్కువ పరిమితులు ఉన్నాయన్న ఆలోచనతో ఎక్కువ ఖర్చు చేసే అవకాశం పెరిగి రుణభారం పెరిగే ప్రమాదం ఉంటుంది.
